विराटनगर, १४ फागुन । लगातार नेप्से परिसुचकमा गिरावट आएपछि विराटगनरमा शेयर कारोवार गर्नेको संख्यामा पनि गिरावट आएको छ ।
राजधानीमा नेप्सेमा गिरावट आएको समयमा कारोवार रकम वृद्धि भएपनि विराटनगरका ब्रोकरमार्फत शेयर कारोवार गर्नेहरु भने लगानी गर्न अनिच्छुक देखिएका हुन् ।
सोमवार नेप्से परिसूचकमा १५ अंकले गिरावट आएको थियो । नेप्सेमा गिरावट आउँदा सस्तोमा लगानी गर्न उत्साहित हुनुपर्नेमा बजार अनुसार नै लगानीकर्ताहरुमा पनि उत्साह नदेखिएको श्रीकृष्ण सेक्युरिटिज प्रा.लि. विराटनगरका बिनित अग्रवालले बताउनुभयो । अग्रवाललको अनुभवमा समग्रमा नेप्सेमा गिरावट आउँदा लगानी गर्नेहरु कम हुने र बढोत्तरी हुँदा लगानी बढी हुने चरित्र देखिने गरेको छ ।
विराटनगरमा त गिरावटको अवस्थामा लगानी गर्नेहरु अत्यन्त न्युन हुने गरेको छ । सोमबार विराटनगरबाट नगन्य मात्रामा शेयर कारोवार भएको ब्रोकर एजेन्सीहरुले जानकारी दिएका छन् ।
देशको प्रमुख औद्योगिक नगरको रुपमा परिचित विराटनगरमा शेयर बजारमा लगानी गर्नेहरु अधिकांश मध्यम आय भएका पेशाकर्मीहरु छन् । ठूला उद्योगी, व्यवसायीहरु शेयर बजारमा लगानी गर्न त्यति धेरै आकर्षित देखिदैनन् ।
आइतवार १३७५ मा रहेको नेप्से सोमवार १३५८.९५ अंकमा पेनिङ सेलिङ हुन पुगेको थियो । सोमबार सबैभन्दा बढी नेपाल लाइफ इन्स्योरेन्स कम्पनीको सबैभन्दा बढी १० करोडको शेयर कारोवार भएको छ ।
बजारमा वास्तविक लगानीकर्ता भन्दा ट्रेडरहरु बढी आएका कारणले पनि शेयर बजारलाई निश्चित अंकमा वृद्धि हुनबाट रोकिरहेको लगानीकर्ताहरुको अनुभव छ । बैंकको व्याजदर, राजनीतिक परिवेश आदि कारणले शेयर कारोवारमा निरन्तर गिरावट आइरहेको छ ।
