विराटनगर । विराटनगर महानगरपालिकाभित्र संरक्षणको सुचिमा रहेका बन्यजन्तुको टाउको भेटिएको छ । विराटनगर १२ बखरीस्थित नहरमा बन्यजन्तु संरक्षण ऐनमा सुचिकृत रहेको २ वटा हरिणको काटिएको टाउको भेटिएको हो ।
दुईवटा हरिणमध्ये एउटाको टाउको नहरको डिलमा र अर्को टाउको नहरको पानीमा शनिबार भेटिएको हो । चोरी शिकारी गर्नेहरुले बोरामा प्याक गरी ल्याएर सो ठाउँमा हरिणको टाउकोसहित आन्द्राभुँडी फालेका छन् ।
विराटनगरको अभिबादन टोल र महाबीर टोलको बिचबाट खनिएको नहरको महाबीरटोलतर्फ भने हरिणको हारखोर छरपस्ट छरिएको अवस्थामा भेटिएको छ । यसअघि एकसाता अघि पनि सोहिक्षेत्रमा ठाउँमा चोरी शिकारी गरिएको हरिणको टाउको भेटिएको स्थानीयले जानकारी दिएका छन् ।
विराटनगर १२ का वडाध्यक्ष हिरालाल कामतले हरिणको टाउको भेटिएको खबर खबर गरेपछि पुगेको प्रहरीले घटनास्थलको मुचुल्का उठाएको छ ।
जंगलभन्दा टाढा रहेको विराटनगरमा हरिणको हाडखोर र टाउको भेटिनुले विराटनगरमा बस्नेहरुले नै वन्यजन्तुको तस्करी गरिरहेको पाइएको छ । नगरक्षेत्रभित्रै संगठित रुपमा यसप्रकारको आपराधिक गतिबिधि हुने गरेको स्थानीयको अनुमान छ । वन्यजन्तु संरक्षण ऐनले हरिणको शिकार गर्न प्रतिबन्ध लगाएको छ ।
