धादिङ । धादिङको निलकण्ठ नगरपालिका–९ मैलीभञ्ज्याङमा ट्रक दुर्घटना हुँदा ६ जनाको ज्यान गएको छ । मंगलबार ग १ ख ८०१२ नम्बरको ट्रक पल्टिँदा ६ जनाको ज्यान गएको छ भने ३० जनाभन्दा धेरै घाइते भएको छन् । ज्वालामुखी गाउँपालिका–४ ढोला मण्डली माईबाट फर्किने क्रममा ट्रक पल्टिएर भएको दुर्घटनामा मृत्यु भएकाहरुको परिचय खुल्न बाँकी रहेको जनाइएको छ ।
ढोलामण्डलीको दर्शन गरेर फर्किदै गरेका करिब ४० यात्रु सवार रहेको ट्रक तीब्र गतिका कारण मैलीभञ्ज्याङको सडकमै पल्टिएको हो । दुर्घटनामा गम्भीर घाइते चालकसहित अन्य घाइते सबैको स्थानीय अस्पतालमा उपचार भइरहेको जिल्ला अस्पताल धादिङका अध्यक्ष महेन्द्र धमलाले जानकारी दिए ।
