लेटाङ्ग– लेटाङ्ग नगरपालिकामा आमाबाबु विहिन बालबालिकालाई निशुल्क शिक्षा एवं छात्रवृत्ति वितरण कार्यक्रम शुभारम्भ भएको छ । नवनिर्वाचित नगर प्रमुख भुपेन्द्र कुमार लावतीले आफ्नो पदभार ग्रहण गर्ने क्रममा गरेको प्रतिबद्धता बमोजिम उक्त कार्यक्रम प्रारम्भ गरिएको हो ।
उक्त कार्यक्रम आमाबाबु नभएकै कारण नगर भित्रका कुनै पनि बालबालिका शिक्षा लिनबाट बञ्चित हुन नपरोस् भन्ने उद्देश्यले आयोजना गरिएको नगर शिक्षा शाखा प्रमुख उपसचिव कृष्णराज राईले वताउनु भएको छ । उहाँका अनुसार यस्तो छात्रवृत्ति सामुदायिक विद्यालयमा अध्ययनरत कक्षा एक देखि १२ सम्मका आमाबाबु विहिन छात्रछात्राहरुलाई वितरण गरिने छ ।
कार्यक्रमको यहि चैत्र दुई गते लेटाङ्ग सातको वडाकार्यलयमा एक कार्यक्रमको आयोजना गरी शुभारम्भ गरिएको छ । उक्त अवसरमाआमाबाबु विहिन स्थानिय महेन्द्र माध्यमिक विद्यालयमा अध्ययनरत तिनजना विद्यार्थीहरुलाई छात्रवृत्ति रकम , लत्ताकपडा र विमाकार्ड वितरण गरी कार्यक्रमको शुभारम्भ गरिएको हो । छात्रवृत्ति अन्तरगत प्रति विद्यार्थी वार्षिक खर्च वापत १८ हजार नगद , खाजा खर्च वापत तिन हजार ५ सय , संरक्षक सहितको पारिवारिक स्वास्थ्य विमा र लत्ताकपडा (शिरक , डसना , सिरानी , दरी , तन्ना र सिरकको खोल ) वितरण गरिएको छ । यो कार्यक्रममार्फत अब देखि नगरभरीका आमाबाबु विहिन बालबालिकालाई वार्षिक रुपमा नै यस्तो छात्रवृत्ति वितरण गरिने नगर प्रमुख लावतीले वताउनु भएको छ । उहाँका अनुसार लत्ताकपडा भने आवस्यकता अनुरुप वितरण गरिने छ ।
उक्त छात्रवृत्ति लेटाङ्ग सात तल्लो फेदाप्जुङ्ग निवासी हुकुम लिम्बूका भाइ खिप्सु , बहिनी खोसु र नाम्साङ्ग लिम्बूलाई प्रदान गरिएको छ । उनिहरु स्थानीय महेन्द्र मा. वि. मा क्रमश: कक्षा आठ , दश र छ मा अध्ययनरत विद्यार्थीहरु हुन् । हुकुम लिम्बू उनिहरुका एक मात्र अविभावक हुन् भने उनिहरुका आमाबुवा क्ष्यरोगका कारण आज भन्दा आठ- दश वर्ष अघिनै वितिसकेकाछन् । हुकुमले कक्षा १२ यस अघिनै उतिर्ण गरिसकेका छन् ।
