जाँते । मोरङ लेटाङ–९ जाँतेस्थित बसन्त हरियाली सामुदायिक वन उपभोक्ता समूहले विपन्न उपभोक्ताहरुलाई घर निर्माणका लागि चिरान काठ निःशुल्क प्रदान गरेको छ । वन समूहले एक कार्यक्रमको आयोजना गरी ८ विपन्न परिवारलाई घरको छानोकालागि डाँडा भाटा (कोरा बत्ति) वितरण गरेको हो ।
कार्यक्रमका प्रमुख अतिथि जाँते सव–डिभिजन वन कार्यालयका प्रमुख राजेश घिमिरेसहितका अतिथिहरुले उक्त तयारी काठ वितरण गरेका हुन् । निःशुल्क काठ पाउनेहरुमा हरिप्रसाद बाँस्तोला, अस्मिता वि.क., शुशिला गिरी, मोहनीप्रसाद उपाध्याय, सीता आले, सनम मगर, डम्बर राई र तारा मास्कि मगर रहेका छन् ।
समूहले उपभोक्ता मुल्यमा जनही ६१ हजार ८७५ रुपैयाँ बराबरको तयारी काठ वितरण गरेको बताइएको छ । विपन्न उपभोक्ताहरुलाई लक्षित गरी समूहले हरेक वर्ष घर निर्माण र मर्मतका लागि निःशुल्क काठ प्रदान गर्ने गरेको समूहका अध्यक्ष होमनाथ सुबेदीले जानकारी दिए ।
अध्यक्ष सुबेदीका अनुसार समूहले जीविको पार्जनमा सहयोग पु¥याउने उद्देश्यले विपन्न उपभोक्ताको आयआर्जनका लागि विभिन्न समयमा सिपमुलक तालिमको आयोजना गर्ने गरेको छ ।
समूहले लेटाङ नगरपालिका वडा नं. ९ का कुल ५१२ घरधुरीका १ हजार ७९२ जनसंख्यालाई काठ, दाउरादेखि लिएर वन पैदावार उपलब्ध गराउँदै आएको छ । वि.सं. २०६८ सालमा समुदायमा हस्तान्तरित यो सामुदायिक वन ३ सय ३८ दशमलब १६ हेक्टर क्षेत्रफलमा फैलिएको छ ।
