शनिश्चरे । विगत २ वर्षदेखि बालबालिकालाई निःशुल्क ट्युसन कक्षा चलाउँदै आएको ट्युसन सेन्टरलाई इटहरीका दुई व्यवसायीले शैक्षिक सामग्री प्रदान गरेका छन् । आज विहीबार मोरङ पथरीशनिश्चरे–४ स्थित महारानी ट्युसन सेन्टरका बालबालिकाहरुलाई व्यवसायिद्वय लक्ष्मण पौडेली र निरकुमार पौडेलीले उक्त सामग्री हस्तान्तरण गरेका हुन् ।
व्यवसायीद्वयले बालबालिकाहरुलाई अध्ययनमा मद्दत पुगोस् भन्ने उद्देश्यले निःशुल्क रुपमा शैक्षिक सामग्री वितरण गरेको बताएका छन् । उनीहरुले जनही दुई वटा कापी र डटपेन वितरण गरेका हुन् । महारानी ट्युसन सेन्टरमा दुई दर्जनबढी विपन्न बस्तीका बालबालिकाहरु अध्ययन गरिरहेको ट्यसन सेन्टरका अध्यक्ष एवं संरक्षक भद्रमान विश्ववकर्माले जानकारी दिए ।
पथरीशनिश्चरे नगरपालिका वडा नं. ४ निवासी पूर्व शिक्षक, समाजसेवी विश्वकर्माले ट्युसन सञ्चालन गर्नु अघि बच्चाहरू छरिएर रहेका बताए । विश्वकर्माले भने ‘निःशुल्क ट्युसन सञ्चालनमा आएपछि बच्चाहरू पढ्न सुरु गरेका छन् ।’ निःशुल्क ट्युसन सेन्टर सञ्चालन गर्नुको उद्देश्य बच्चाहरुलाई सानैदेखि कुलतबाट टाढा राखी पढाईप्रति आकर्षित गर्नु रहेको उनले बताए । अहिले चौतर्पीरुपमा लागुऔषध सामाजिक समस्याको रुपमा विकसित भइरहेकोले यसको न्यूनिकरण अनिवार्य रहेको विश्वकर्माले बताए ।
पथरीशनिश्चरे नगरको पूर्व जनप्रतिनिधि समेत रहेका विश्वकर्माले ट्युसन सेन्टर दीर्घकालिन रुपमा सञ्चालन गर्ने उद्देश्य राखेका छन् ।
विश्वकर्मा भागिरथ माविको अवकासप्राप्त शिक्षक एवं पूर्व जनप्रतिनिधि समेत हुन् ।
