पथरी शनिश्चरे, पथरी शनिश्चरे वडा नं. ३ मा डेंगी रोकथाम तथा नियन्त्रणका लागि अन्तरक्रिया कार्यक्रम सम्पन्न भएको छ । वडा नं. ३ मा डेंगी संक्रमण वृद्धि भएसँगै आज वडा कार्यालयले डेंगी रोकथाम तथा नियन्त्रणका लागि अन्तरक्रिया कार्यक्रम सम्पन्न गरेको हो । यसैगरी आज नै आइतबारे बजारमा ‘सर्च एण्ड डिस्ट्रोय’ कार्यक्रम सम्पन्न गरिएको छ ।
विशेष गरेर वडाको पिपल चौक, सेर्मा चौक, सगरमाथा टोल र मगर टोलमा डेंगी संक्रमण भएपछि वडावासीलाई सतर्क रहन सो कार्यक्रम आयोजना गरिएको हो । सो कार्यक्रममा नगरपालिकाका स्वास्थ्य शाखा सह–संयोजक सिअहेव एकराज खत्रीले सहजीकरण गर्नुभएको थियो । वडाध्यक्ष विजय लिम्बुको अध्यक्षतामा भएको सो कार्यक्रम आधारभूत स्वास्थ्य केन्द्रका अहेव आशिष गौतमले सञ्चालन गर्नुभएको थियो ।
सो कार्यक्रममा वडाका विद्यालयका प्रअहरु, वि.व्य.स. अध्यक्षहरु, वडाका स्वयंसेविका र वडावासीहरुको उपस्थिति रहेको थियो । अब वडाले हरेक टोल टोलमा डेंगी रोकथाम तथा नियन्त्रणका लागि ‘सर्च एण्ड डिस्ट्रोय’ कार्यक्रम सञ्चालन गर्ने वडाध्यक्ष लिम्बुले जानकारी दिनुभयो ।
वडाले यसभन्दा अघि पनि ‘सर्च एण्ड डिस्ट्रोय’ कार्यक्रम गर्दै आइरहेको आधारभूत स्वास्थ्य केन्द्रका अहेव आशिष गौतमले जानकारी गराउनुभयोे । नगरपालिकामा हालसम्म २५ जनाई डेंगी संक्रमण भएको स्वास्थ्य शाखाले जनाएको छ ।
