मोरङ / झापाको बिर्तामोड–४ मा मुख्य कार्यालय रहेको कर्णाली बचत तथा ऋण सहकारी संस्था लिमिटेडले २४ औं बार्षिक साधारणसभाको अवसरमा माइन्यूट लेखन तथा प्रमाणीकरण सभा सम्पन्न गरेको छ ।
कोशी प्रदेशका भौतिक, पूर्वाधार विकास राज्यमन्त्री भूमिप्रसाद राजवंशीले प्रमाणिकरण सभाको उद्घाटन शुक्रबार गर्नुभएको थियो । उनले केही सहकारीको गलत गतिविधिका कारण आम सहकारी संस्थाहरुलाई चोट पुगेको बताउनुभयो । उनले सहकारीहरुले काम गराईको विश्वासिलो वातावरण निर्माण गर्नुपर्नेमा जोड दिनुभएको थियो ।
संस्थाका अध्यक्ष टसबहादुर प्रधानले २४ औँ अन्तिम माइन्युट प्रमाणीकरण सभामा वार्षिक प्रतिवेदन प्रस्तुत गरेका थिए। प्रतिवेदन अनुसार आर्थिक वर्ष २०८० / ०८१ को असार मसान्तसम्म ५६ हजार ४०९ जना शेयर सदस्य, २ अर्ब ७८ करोड ८३ लाख ९४ हजार ११० रुपैयाँ निक्षेप बचत, ३ अर्ब ७६ करोड ८० लाख ४८ हजार १५६ रुपैयाँ ऋण लगानीमा रहेको छ ।
२४ औं बार्षिक साधारणसभासम्म आइपुग्दा संस्थाको चुक्ता शेयर पुँजी ५१ करोड ९३ लाख ७५ हजार ७०० रुपैयाँ पुगेको अध्यक्ष टसबहादुर प्रधानले कार्यक्रममा प्रस्तुत गरेको प्रतिवेदनमा छ । संस्थाको कोषमा ५४ करोड ७७ लाख ६१ हजार ६१६ रुपैयाँ रहेको, जसमध्ये १७ करोड २४ लाख ९० हजार २२९ रुपैयाँ आवश्यक परेको समयमा निकाल्न सकिने र ३७ करोड ५२ लाख ७१ हजार ३७८ रुपैयाँ संस्थामा मौज्दात रहने अध्यक्ष प्रधानको प्रतिवेदनमा उल्लेख छ ।
झापा, मोरङ र इलाम गरी तीन जिल्लाका २६ पालिकामा कार्यक्षेत्र रहेको कर्णालीले स्वीकृति भएको ४६ सेवाकेन्द्रमध्ये ४१ वटा सेवाकेन्द्रबाट सदस्यलाई सेवा प्रदान गर्दै आएको छ । कर्णालीले आफ्ना ४१ वटा सेवाकेन्द्रहरुलाई ७ वटा इकाइमा विभाजन गरी गत कात्तिक २५ गतेदेखि इकाइगत साधारणसभा गरेको थियो । सोही कार्यक्रमकाबिच साकोसका लक्ष्मीपुर सेवाकेन्द्रका मृतक सदस्यको परिवारलाई २ लाख रुपैयाँको चेक हस्तान्तरण गरिएको छ ।
मृतक नारायणप्रसाद यादवकी हकवाला श्रीमती ज्योती यादवलाई छोरा लक्ष्मी यादवमार्फत उक्त चेक हस्तान्तरण गरिएको थियो । संस्थाले यसअघि पनि यादवले लिएको ऋण मिनाहलगायत गरेर यो २ लाखसहित ५ लाख १३ हजार ९७२ रुपैयाँ प्रदान गरेको सचिव भूपाल बस्नेतले जानकारी दिनुभयो ।
संस्थाका उपाध्यक्ष रामकुमार गौतमले स्वागत गरेको कार्यक्रममा झापा जिल्ला सहकारी संघका अध्यक्ष गणेश ढकाल, झापा जिल्ला बचत तथा ऋण सहकारी संघका वरिष्ठ उपाध्यक्ष उपेन्द्रप्रसाद ओलीलगायतले शुभकामना व्यक्त गरेका थिए । कार्यक्रमको सञ्चालन सचिव बस्नेतले गरेका थिए ।
