शनिश्चरे, पथरी शनिश्चरे वडा नं. ८ ले निरन्तरता दिदै आएको ‘जनतासँग जनप्रतिनिधि’ प्रभावकारी बन्दै गइरहेको छ । वडा नं. ८ का जनप्रतिनिधिहरू निर्वाचनको समयमा मात्रै होइन, निर्वाचित भए पश्चात् पनि निरन्तर जनताको घरदैलोमा पुगिरहनुभएको छ ।
वडाले वि.सं. २०७९ असोज महिनाको अन्तिम शनिबारदेखि सुरुवात गरेको यो कार्यक्रम वडा हुँदै नगरवासीको लागि नयाँ प्रयोग भएको साथै अहिले लोकप्रिय बन्दै गएको वडावासीहरुले बताउन थालेका छन् ।
वडाले हरेक महिनाको अन्तिम शनिबार जनताको घरदैलोमा जाने भेटघाट गर्ने, गफ गर्ने, सल्लाह÷सुझाब लिने, गुनासो सुन्ने सोचका साथ यो कार्यक्रम गर्दै आइरहेको छ । जनताको घरदैलोमा जादा भोट हालेर जिताएका नागरिकहरूको घरमा सुत्ने खाट नभएर चिसोमा भुइ÷ बाँसको खाटमा सुत्नुपर्ने बाध्यता रहेको भेटिएपछि अभावले भुइमा सुत्नु नपरोस भनेर वडा कार्यलयबाट १२ परिवारलाई सुत्ने खाट वितरण गरिएको वडाध्यक्ष नविन कार्कीले जानकारी दिनुभयो ।
यसैगरी वडाले शौचालय नभएका परिवारलाई ५३ वटा शौचालय निर्माण गरी प्रदान गरिएको वडाध्यक्ष कार्कीले बताउनुभयो ।
