पथरीशनिश्चरे । कोरोना संक्रमण फैलिन नदिन गरिएको लकडाउनको मौका छोपेर मोरङको पथरी शनिश्चरे २ स्थित प्रगति टोलको एउटा किराना पसलमा बढी मुल्यमा सामान बेच्ने गरेको पाइएपछि पसलमा ताला लगाइएको छ ।
नगर उपप्रमुख यमुना विष्ट वास्तोलाको अगुवाईको अनुगमन् समिति, इलाका प्रहरी कार्यालय, पथरी उद्योग वाणिज्य संघ तथा राजनीतिक दलका प्रतिनिधि सम्मिलित टोलीले बुधबार त्यहाँ छड्के अनुगमन्का क्रममा कालोबजारी गरेको पाएको हो ।
चिन्तामणि गौतमले सञ्चालन गरेको सो पसलबाट आज १ सय १० रुपैयाँ किलोग्रामको मुसुरी दाललाई १ सय ४० र ४० को सुजीलाई ४५ रुपैयाँमा विक्री गरेको भेटिएपछि टोलीले पसलमा ताला लगाएको अनुगमन् संयोजक यमुना विष्ट वास्तोलाले जानकारी दिए ।
पसल सञ्चालकलाई बढी मुल्यमा सामान नबेच्न चेतावनी दिँदै नगरपालिका कार्यालयमा उपस्थित हुन निर्देशन गरिएको छ । अनुगमन् टोलीले अत्यावश्यकीय खाद्यान्नहरुमा मुल्य बृद्धि नगर्न अनुरोध गर्दै लगातार बजार अनुगमन् गरिरहेको छ ।
