नेपालमा कोरोना संक्रमितको संख्या ५ सय ७ पुग्यो

 काठमाडौं ।नेपालमा कोरोना भाइरसबाट संक्रमित हुनेको संख्या पाँच सय नाघेको छ ।अहिलेसम्म पाँच सय सात जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
पछिल्लो विवरण अनुसार थप २० जनामा कोरोना संक्रमण पुष्टि भएको छ । मन्त्रालयका अनुसार डडेलधुरा र बैतडीमा पहिलो पटक कोरोना संक्रमण देखिएको छ ।मन्त्रालयका प्रवक्ता डाक्टर विकास देवकोटाका अनुसार बाँकेका १४ जना, कैलालीका तीन जना तथा मोरङ, डढेलधुरा र बैतडीका एक एक जना गरी थप २० जनामा कोरोना पुष्टि भएको हो । यसअघि आज बिहान मात्रै ३० जनामा कोरोना पुष्टि भएकोमा दिउँसो फेरि २० जना थपिएको उनले जानकारी दिए ।
यस्तै आज बाँकेको सुशील कोइराला प्रखर क्यान्सर अस्पतालमा उपचार गराइरहेका २१ जना निको भएपछि घर फर्किएका छन् । योसँगै नेपालमा कोरोना जित्नेको संख्या ७० जना पुगेको छ । अहिलेसम्म नेपालको ४० जिल्लामा कोरोना संक्रमणका बिरामी भेटिएका छन् ।
नेपालमा अहिलेसम्म कोरोना संक्रमणबाट तीन जनाको ज्यान गएको छ ।