शनिश्चरे । पथरी शनिश्चरे नगरपालिका वडा नम्बर ८ ले आफ्नो वडाभित्रका खोपकेन्द्रमा मासिकरुपमा खोप लगाउन आउने महिला तथा बालबालिकाको लागि निशुल्क सिटिसफारीको ब्यबस्थापन गरेको छ ।
वडा अध्यक्ष नवीन कार्कीका अनुसार वडाभित्र रहेका दुईवटा खोपकेन्द्रहरु २० गते सञ्चालनहुने शुक्रबारे खोपकेन्द्र र २१ गते सञ्चालनहुने सोमबारे खोपकेन्द्रमा आफ्ना बालबालिकाहरुलाई मासिकरुपमा खोप लगाउन परपरबाट आउदा ब्यहोर्नु परेको कठिनाईलाई मध्यनजर गरि आगामी मङ्सिर महिनादेखी “वडा अध्यक्ष मेरो साथी” कार्यक्रम अन्तर्गत सिटिसफारीको निशुल्क ब्यबस्थापन गरिएको छ ।
सिटिसफारी आवश्यक हुनेहरुले आफ्ना नजिकैका वडा सदस्यहरूलाई सम्पर्क गरेमा घरदेखी खोपकेन्द्रसम्म ल्याएर खोप लगाइ पुनः घरसम्म निशुल्क आवतजावत गराइने छ । साना बालबालिकालाई खोप लगाउन तातो घाममा हिड्दै आउनुपरेपछी त्यसलाई समाधान गर्न वडाले कार्यक्रम सुरु गरेको जनाइएको छ ।
